Дар толори маҷлисгоҳи Мақомоти иҷроияи ҳокимияти давлатии ноҳияи Нуробод муаррифии иҷрокунандаи вазифаи раиси ноҳияи Нуробод баргузор шуд. Муовини Сарвазири Ҷумҳурии Тоҷикистон Зиёзода Сулаймон Ризоӣ зимни мулоқот бо фаъолони ноҳия иброз дошт, ки бо Фармонҳои Президенти Ҷумҳурии Тоҷикистон аз 7 январи соли 2025 Ҷобирзода Додарҷон Пулод бо сабаби ба кори дигар гузаштан аз вазифаи раиси ноҳияи Нуробод озод шуда, Солеҳзода Фатҳуддин Ҳусен иҷрокунандаи вазифаи раиси ноҳияи Нуробод таъин гардид. Муовини Сарвазири мамлакат Зиёзода Сулаймон Ризоӣ аз хизматҳои Ҷобирзода Додарҷон Пулод дар рушди хоҷагии халқи ноҳия ёдовар шуда, барои хизматҳои назаррасаш ба ӯ изҳори сипос намуда, ба корҳои минбаъдааш барору комёбиҳо орзу кард. Ба роҳбарияти ноҳияи Нуробод ҷиҳати таъмини рушди соҳаҳои саноату кишоварзӣ, маорифу тандурустӣ, баррасии фаврии муроҷиатҳои шаҳрвандон, ҳалли мушкилоти мавҷуда ва иҷрои саривақтии дастуру супоришҳои Ҳукумати мамлакат супоришҳо дода шуд.